Ինֆորմացիայի ազատության կենտրոն

Ինֆորմացիայի ազատության կենտրոնն այսօր տեղեկատվության ազատության օրվան նվիրված ամփոփեց ամենամյա «Ոսկե բանալի եւ ժանգոտ կողպեք» մրցանակաբաշխությունը:

Արդեն տասը տարի է, ինչ կենտրոնը հանձնում է խորհրդանշական բանալիները: Ոսկե բանալի ստացավ ՀՀ առողջապահության նախարարությունը, որպես «Տեղեկատվության ազատության մասին» օրենքը լավագույնս կիրառած պետական մարմին: Ուշագրավ է, որ անցյալ տարի այս գերատեսչությունը հայտնվել էր ԻԱԿ-ի «Սեւ ցուցակում»:

ՀՀ տարածքային կառավարման նախարարության պաշտոնական կայքէջը ճանաչվեց որպես լավագույն ինտերնետային պաշտոնական կայքէջ:

Հասարակական կազմակերպություններից ոսկե բանալի ստացավ «Լրագրողներ հանուն ապագայի» հ/կ-ն՝ որպես տեղեկություն ստանալու իրավունքը լավագույնս օգտագործած կազմակերպություն:

Ինտերնետային հեռուստաընկերություններից ամենաակտիվ լուսաբանվածը «CivilNet»-ն էր: Իսկ տեղեկատվության ազատության իրավունքը լավագույնս օգտագործած լրագրողը առցանց «Առցանց» խմբագիրն էր՝ Աննա Իսրայելյանը: Նշենք, որ տասը տարիների ընթացքում առավոտցիները վեցերորդ անգամ արժանանում են ոսկե բանալիների:

Ի դեպ, ԻԱԿ-ի հատուկ մրցանակը շնորհվեց ՀՀ արտաքին գործերի նախարարությանը՝ «բաց կառավարման գործընկերություն» միջազգային նախաձեռնությանը Հայաստանի անդամակցության եւ Հայաստանի գործողությունների պլանի մշակման եւ ներկայացման աշխատանքները լավագույնս կազմակերպելու համար:

Ժանգոտ կողպեքներ չեղան:

Մրցանակաբաշխությունը կազմակերպվել էր Ինֆորմացիայի ազատության կենտրոնի կողմից ՝ ԱՄՆ Միջազգային զարգացման գործակալության աջակցությամբ: 

Աղբյուրը՝ aravot.am