Ինֆորմացիայի ազատության կենտրոն

 Մարզեր

Անցած 5 տարիների ընթացքում չսահմանված վայրերում աղբ թափելու համար ՀՀ բոլոր մարզերում տուգանվել է ընդամենը 58 ֆիզիկական եւ իրավաբանական անձ։ Ըստ ստացված  պաշտոնական պատասխանների՝ վարչական պատասխանատվության ամենամեծ թիվն արձանագրվել  է Կոտայքի մարզում՝ 16 դեպք։ Երկրորդ տեղում  Լոռին է՝ 15 դեպքով, 10-ական արձանագրությամբ  հաջորդում են Արարատի և  Գեղարքունիքի մարզերը։ Իսկ Տավուշի և Արագածոտնի մարզերում անցած 5 տարիների ընթացքում ընդամենը մեկական վարչական վարույթ է հարուցվել աղբը չսահմանված վայրում թափողների նկատմամբ։ Շիրակի և Վայոց ձորի մարզերում, որոնք ևս տուրիստական ակտիվ ուղղություններ են,  չսահմանված վայրում աղբ թափելու համար որևէ անհատ կամ կազմակերպություն չի տուգանվել:

Այս տվյալները ստացվել են ԻԱԿ-ի՝ տեղեկություն ստանալու հարցումների շնորհիվ, որոնց նպատակն էր պարզել, թե որքանով են մարզային իշխանություններն ու համայնքները քայլեր ձեռնարկում՝ կանխելու մարզերում չսահմանված վայրերում աղբ թափելու պրակտիկան և պատժելու օրինախախտներին, ովքեր շրջակա միջավայրը վերածում են աղբավայրի։

2020թ-ի հուլիսի 28-ին ԻԱԿ-ը էլեկտրոնային հարցմամբ դիմել է ՀՀ բոլոր մարզպետարաններ՝ խնդրելով տրամադրել տվյալներ վերջին 5 տարվա ընթացքում կիրառած տուգանքների վերաբերյալ, թե չսահմանված վայրում աղբ թափելու համար տուգանքի քանի դեպք է արձանագրվել՝ ըստ տարիների:

 

Բոլոր մարզպետարանները տրամադրել են լիարժեք պատասխան: Արդյունքներն ամփոփված են ստորև աղյուսակում։

 

Մարզ	2016-2020թթ. տուգանքների թիվը
Կոտայք	16  ֆիզիկական անձ
Լոռի	2    իրավաբանական անձ 13  ֆիզիկական անձ
Արարատ	4    իրավաբանական անձ 6    ֆիզիկական անձ
Գեղարքունիք	10  ֆիզիկական անձ
Սյունիք	1   իրավաբանական անձ 2   ֆիզիկական անձ
Արմավիր	1   իրավաբանական անձ 1   ֆիզիկական անձ
Արագածոտն	1  ֆիզիկական անձ
Տավուշ	1   ֆիզիկական անձ
Շիրակ	0
Վայոց Ձոր	0
Ընդամենը	58

 

Վարչական պատասխանատվության արձանագրված դեպքերի ամենափոքր թիվը Տավուշի և Արագածոտնի մարզերում է՝ անցած 5 տարիների ընթացքում ընդամենը մեկական վարչական վարույթ յուրաքանչյուր մարզում։ Դիտարկվող ժամանակահատվածում Շիրակի և Վայոց ձորի մարզերում չսահմանված վայրում աղբ թափելու համար որևէ անհատ կամ կազմակերպություն չի տուգանվել:

Ընդհանուր առմամբ, այսպիսով, հանրապետության  10  մարզում 5  տարվա ընթացքում արձանագրվել է չնախատեսված վայրում աղբ թափելու համար ֆիզիկական անձանց՝ վարչական պատասխանատվության ենթարկելու 50 և իրավաբանական անձանց՝ 8 դեպք, ընդհանուր առմամբ՝ 58  դեպք։

Երեւան

Մայրաքաղաքում անցած 5 տարում չնախատեսված վայրերում աղբ թափելու համար պատասխանատվության ենթարկելու վիճակագրությունը շատ ավելի հուսադրող է. վարչական իրավախախտման 590 դեպք է արձանագրվել. պատասխանատվության է ենթարկվել 8 իրավաբանական և 582 ֆիզիկական անձ:

Այս աղյուսակում վարչական պատասխանատվության դեպքերի մանրամասն վիճակագրությունն է՝ ըստ մայրաքաղաքի  համայքների.

                                                         

Համայնք	2016-2020թթ. տուգանքների թիվը
Կենտրոն	126   ֆիզիկական անձ
Շենգավիթ	81  ֆիզիկական անձ
Նոր-Նորք	2    իրավաբանական անձ 74    ֆիզիկական անձ
Արաբկիր	3  իրավաբանական անձ 71 ֆիզիկական անձ
Մալաթիա Սեբաստիա	53   ֆիզիկական անձ
Քանաքեռ-Զեյթուն	52  ֆիզիկական անձ
Դավթաշեն	1  իրավաբանական անձ
Տավուշ	42   ֆիզիկական անձ
Էրեբունի	1 իրավաբանական անձ 33 ֆիզիկական անձ
Աջափնյակ	26 ֆիզիկական անձ
Ավան	1 իրավաբանական անձ 22 ֆիզիկական անձ
Նուբարաշեն	2 ֆիզիակական անձ
Նորք Մարաշ	0
Ընդամենը	590

 

Կենտրոն համայնքը վարչական պատասխանատվության արձանագրված 126 ցուցանիշով մայրաքաղաքում բացարձակ առաջատարն է,  81 դեպքով հաջորդում է Շենգավիթը, երրորդ տեղում  Նոր Նորքն է՝ 76 դեպքով:  Տուգանքների ամենացածր ցուցանիշը  Նուբարաշեն համայնքում է արձանագրվել՝ 2  դեպք, իսկ Նորք Մարաշում որևէ ֆիզիկական կամ իրավաբանական անձ պատասխանատվության չի ենթարկվել: