Ինֆորմացիայի ազատության կենտրոն

Թափանցիկություն և հաշվետվողականություն.
համագործակցություն կառավարության և քաղաքացիական հասարակության միջև

2013 թվականի հունիսի 14-ին Երևանում մեկնարկեց "Բաց կառավարման գործընկերություն-Հայաստան" առաջին միջազգային համաժողովը: Համաժողովն իրականացվեց Ինֆորմացիայի ազատության կենտրոնի կողմից ՀՀ Կառավարության հետ համատեղ ԱՄՆ ՄԶԳ աջակցությամբ: Ողջույնի խոսքով հանդես եկան ՀՀ վարչապետ Տիգրան Սարգսյանը և Հայաստանում ԱՄՆ արտակարգ և լիազոր դեսպան Ջոն Հեֆերնը:

ՀՀ կառավարության անունից ողջունելով համաժողովի մասնակիցներին՝ Տիգրան Սարգսյանը նշել է.  «Կարևորում եմ այս համաժողովի անցկացումը, քանի որ մեր առջև ծառացած են կարևորագույն և սկզբունքային խնդիրներ, որոնց լուծումները պարտավոր ենք գտնել: Կառավարության ցանկացած ծրագիր կարող է ունենալ հաջողություն, եթե դրա սկզբունքները, գաղափարախոսությունը նախապես ներկայացվում են հանրությանը, դառնում քննարկման և քննադատության առարկա, որից հետո էլ ընդունվում և սկսվում են իրականացվել: Սա քաղաքացիական հասարակության կառուցման ճանապահն է: Տոտալիտար համակարգից անցումը քաղաքացիական հասարակության և ժողովրդավարական ինստիտուտների` բավականին դժվար և ցավոտ ճանապարհ է, որովհետև այն ենթադրում է, որ հասարակության յուրաքանչյուր անդամ պետք է փոխի իր մտածողությունը, ամենօրյա գործառույթները, հակառակ դեպքում ապրելու ենք այնպես, ինչպես երեկ: Աշխարհի ոչ մի կառավարություն հաջողության չի հասնի, եթե հասարակությունում այդ հիմնարար փոփոխությունները տեղի չունենան»:   

Կառավարության ղեկավարի դիտարկմամբ՝ սա ենթադրում է, որ միասին պետք է սովորենք աշխատել նոր միջավայրում, երբ տեղեկատվությունը բաց է և թափանցիկ, հասանելի հասարակության համար: 

Իր հերթին, ՀՀ-ում ԱՄՆ-ի արտակարգ և լիազոր դեսպան Ջոն Հեֆերնը նշել է, որ ՀՀ կառավարությունը սերտորեն համագործակցում է «Բաց կառավարման գործընկերության» շրջանակում և իրենք հավատացած են, որ բաց հասարակությունը և տնտեսությունը հնարավորություն կտան երկրներին ծաղկում ապրել, լինել առավել բարեկեցիկ, անվտանգ և խաղաղ: «Սրա վրա է հիմնվում մեր աջակցությունը «Բաց կառավարման գործընկերության» ուղղությամբ: Իր գործողությունների ծրագրով Հայաստանը կարևոր հանձնառություն է ստանձնել «Բաց կառավարման գործընկերության» առաջ և ես գիտեմ, որ կառավարության կողմից այդ գործողությունների ծրագիրը հաստատվել է, որը քննարկվել և շրջանառության մեջ է դրվել: Այս գործողությունների ծրագրով առաջընթացը կարևոր է Հայաստանի համար, ինչը կօգնի, որ ՀՀ-ն բարելավի իր ցուցանիշները, որոնք դիտարկվում են «Հազարամյակի մարտահրավեր կորպորացիա»-ի կողմից»,- ասել է ԱՄՆ դեսպանը: 

ՀՀ Կառավարության և Ինֆորմացիայի ազատության կենտրոնի կողմից իրականացվող այս համաժողովին ՀՀ կառավարությունը ներկայացրեց ԲԿԳ հայաստանյան գործողությունների ծրագիրը և ծրագրով ստանձնած ՀՀ հանձնառությունների իրականացման ընթացքը: Մասնակիցները հնարավորություն ունեցան ծրագրի կիրառման արդյունավեության հարցերը քննարկել նաև քաղաքացիական հասարակության ներկայացուցիչների դիտակետից. վերջիններս համաժողովի ընթացքում ներկայացրին ԲԿԳ հայաստանյան գործողությունների ծրագրի իրականացման մոնիթորինգի արդյունքները:

Մասնակիցների թվում էին նաև միջազգային փորձագետներ ԱՄՆ-ից, Բուլղարիայից, Էստոնիայից և Վրաստանից, ովքեր ակտիվորեն ներգրավված էին քննարկումներին և ներկայացրին ԲԿԳ նախաձեռնությանն անդամակցելու իրենց երկրների փորձն ու պրակտիկ հմտությունները:

Միջոցառումը կառավարության և քաղաքացիական հասարակության ներկայացուցիչներին միջև արդյունավետ քննարկումների և ՀՀ կառավարության` ԲԿԳ Գործողությունների ծրագրով ստանձնած հանձնառություններն իրականացնելու համար առավել արդյունավետ լուծումներ գտնելու իրական հնարավորություն ընձեռեց:

***
Բաց կառավարման գործընկերությունը ստեղծվել է 2011 թվականին 8 երկրների նախաձեռնությամբ (Բրազիլիա, Ինդոնեզիա, Մեքսիկա, Նորվեգիա, Ֆիլիպիններ, Հարավային Աֆրիկա, Միացյալ Թագավորություն, ԱՄՆ): Այս նախաձեռնությանն այսօր արդեն միացել է ավելի քան 60 երկիր: Հայաստանի հանրապետությունը նախաձեռնությանն անդամակցել է 2011-ի նոյեմբերին: ԲԿԳ հռչակագրում ասվում է, որ այն նպատակ ունի բարձրացնել կառավարողների գործողությունների մասին հրապարակայնությունը, խթանել հասարակության մասնակցությունը հանրային կյանքի կառավարմանը, ձևավորել առավել թափանցիկ և պատասխանատու իշխանություններ: 

Բաց կառավարման գործընկերություն - Հայաստան. միջազգային համաժողովի օրակարգը 

Բաց կառավարման գործընկերության հայաստանյան Գործողությունների ծրագիրը 

 ՀՀ կառավարության հաշվետվությունը ԲԿԳ հայաստանյան Գործողությունների կատարման վերաբերյալ

 Թեմային առնչվող նյութեր`
Կայացավ ԲԳԿ հայաստանյան գործողությունների ծրագրի աշխատանքները համակարգող խմբի առաջին նիստը

Հայաստանը Բրազիլիայում ներկայացրեց Բաց կառավարման գործընկերության ՀՀ գործողությունների ծրագիրը

Բաց կառավարման գործընկերություն" նախաձեռնության շրջանակներում ՀՀ Գործողությունների ծրագրի ներկայացում