Ինֆորմացիայի ազատության կենտրոն

Հուլիսի 24-ին ՀՀ Վարչական դատարանում (326 դահլիճում) տեղի ունեցավ ԻԱԿ-ն ընդդեմ Ազգային անվտանգության ծառայության գործով դատական նախնական նիստը: 

 

Դատարանը պարզեց հայցի առարկան, հիմքերը, լսեց պատասխանող կողմի դիրքորոշումը: Դատարանը պարզեց նաև արդյոք կողմերն ունե՞ն միջնորդություններ, դատարանին ներկայացնելու լրացուցիչ ապացույցներ: Դատարանը որոշեց այս գործով դատավարության նախապատրաստման փուլնն ավարտել և նշանակել դատաքննություն: Հաջորդ դատական նիստը տեղի կունենա 2013 թ.-ի օգոստոսի 29-ին` ժամը 14:30-ին:

 

Հիշեցնենք 2013 թ.-ի ապրիլի 5-ին Ինֆորմացիայի ազատության կենտրոնը հայց էր ներկայացրել ՀՀ Վարչական դատարան ընդդեմ ՀՀ ԿԱ Ազգային անվտանգության ծառայության, քանի որ վերջինս թերի էր պատասխանել ԻԱԿ-ի հարցումներին` ըստ էության չտրամադրելով ԻԱԿ-ի խնդրած տեղեկությունները:

 

Դեռեւս 2013 թ.-ի փետրվարի 11-ին Ինֆորմացիայի ազատության կենտրոնը տեղեկություն ստանալու գրավոր հարցմամբ դիմել էր ԱԱԾ-ին` խնդրելով հայտնել, թե ԽՍՀՄ գոյության ժամանակաշրջանում գաղտնագրված տեղեկությունների գաղտնիության աստիճանի վերանայման կարգի մասին” համաձայնագրի շրջանակներում ո՞ր տեղեկությունների գաղտնիության աստիճանն է վերանայվել, ովքե՞ր կարող են դիմել գաղտնազերծված տեղեկությունները ստանալու համար, գաղտնազերծված տեղեկությունները ո՞ր մարմնից կարելի է ստանալ, ինչպես նաեւ խնդրել էր տրամադրել 18.04.2011 թ. ստորագրված «ԽՍՀՄ գոյության ժամանակաշրջանում գաղտնագրված տեղեկությունների գաղտնիության աստիճանի վերանայման կարգի մասին» համաձայնագրի պատճեն»:

 

ԱԱԾ-ն տրամադրել էր թերի պատասխան` ըստ էության չեր պատասխանել ԻԱԿ-ի ներկայացրած հարցերին, ինչպես նաեւ չէր տրամադրել խնդրված համաձայնագրի պատճենը: 2013 թ.-ի մարտի 7-ին տեղեկություն ստանալու գրավոր կրկնակի հարցմամբ Ինֆորմացիայի ազատության կենտրոնը նորից էր դիմել ԱԱԾ-ին` սակայն կրկին ստացել էր նույն թերի պատասխանը:

 

ԻԱԿ-ը ՀՀ վարչական դատարանից խնդրել է ճանաչել Ինֆորմացիայի ազատության կենտրոն ՀԿ-ի` տեղեկատվության ազատության եւ ողջամիտ ժամկետում պատշաճ պատասխան ստանալու իրավունքների խախտման փաստը եւ պարտադրել ԱԱԾ-ին ԻԱԿ-ին տրամադրել սպառիչ տեղեկատվություն (այս դատական գործի մասին ավելի մանրամասն, ինչպես նաեւ հայցադիմումը տես`http://foi.am/hy/all-cases/item/1210/):